‘एसिसी यू–१६ एस्ट जोन कप २०२५’ का लागि शुक्रबार नेपाली राष्ट्रिय क्रिकेट टोलीको विदाइ समारोहको दृश्य रोचक थियो । कारण– हरेक दृष्टिले पछाडि पारिएको कर्णालीका उदीयमान युवा खेलाडी विपिन शर्माले टोलीको कप्तानी गर्दै थिए । अनि, शर्माको टोलीलाई विदाइ गर्ने अग्र पंक्तिमा थिए, नेपाल क्रिकेट एसोसिएसन (क्यान) का कोषाध्यक्ष पदमबहादुर खड्का । खड्का पनि कर्णालीकै हुनुले विदाइको माहोल मनोरम र उत्साहपूर्ण थियो ।

राष्ट्रको लागि कर्णालीको कप्तानी, नेपालको क्रिकेट इतिहासमा यो पहिलो पल थियो । खड्का भन्दै थिए, ‘हरेक दृष्टिले पछाडि पारिएको र परेको कर्णालीले अब क्रिकेटको माध्यमबाट राष्ट्रको शिर उचो बनाउने विश्वास लिएको छु ।’

खड्काले भने झैं पछिल्लो समय क्रिकेटमा कर्णालीको बेग यति तीब्र गतिमा बढिरहेको छ कि, यसले राष्ट्रिय क्रिकेटको भविष्यलाई नै उज्यालो बनाउने सामर्थ्य बनाइसकेको छ । एसिसी यू–१६ एस्ट जोन कप २०२५ का लागि शुक्रबार सिंगापुर उडेको शर्मा नेतृत्वको टिममा कर्णाली (सुर्खेत) कै रोशन शाही सदस्य छन् ।

क्यानका कोषाध्यक्ष खड्काका अनुसार अहिले क्रिकेटको राष्ट्रिय टिममा कर्णालीका ६ जना खेलाडी रहेका छन् । सिनियर राष्ट्रिय टिममा अर्जुन घर्ती र दीपेन्द्र रावत, महिला राष्ट्रिय टिममा किरण कुँवर र तिर्सना विश्वकर्मा तथा जुनियर टिममा विपिन शर्मा र रोशन शाही रहेका छन् ।

कर्णाली अहिले साँच्चिकै क्रिकेटको लागि उर्वर भूमि बनेको छ । क्यानका अनुसार सुर्खेतमा मात्र करिब १८ सयदेखि २ हजार खेलाडी क्रिकेटमा अभ्यासरहत रहेका छन् । कर्णाली प्रदेशभर करिब ४ हजार खेलाडीले क्रिकेट खेलिरहेका खड्काको भनाइ छ । ‘क्रिकेटले कर्णालीको नाम चम्काएको छ, अब कर्णालीले राष्ट्रको नाम चम्काउनेछ,’ उनले भने ।

करिब एक दसकअघि क्रिकेटमा बामे सरेको कर्णाली प्रदेशले पछिल्लो ३–४ वर्षमा उल्लेखनीय फड्को मारेको छ । यसमा खड्काको योगदान महत्वपूर्ण रहेको छ । क्यानको जिल्ला अध्यक्ष, प्रदेश अध्यक्ष, केन्द्रीय सदस्य हुँदै केन्द्रीय कोषाध्यक्ष भएका खड्का कर्णालीको परिचित समाजसेवी र व्यवसायी हुन् । उनले कर्णालीका क्रिकेटको विकास गर्न प्रभावकारी भूमिका निर्वाह गर्दै आएका छन् । उनी कोषाध्यक्ष भएपछि २०७९ फागुनमा क्यानको केन्द्रीय साधारणसभा सुर्खेत भएको थियो । त्यसैगरी गएको जेठमा सुर्खेतमै राष्ट्रिय यू–१६ प्रतियोगिता भएको थियो । यस्ताखाले कार्यक्रम र प्रतियोगिताले कर्णालीमा क्रिकेटको विकासमा टेवा पु¥याएको मान्न सकिन्छ ।

अहिले कर्णालीको सुर्खेतमा मात्र होइन, पहाडी तथा हिमाली जिल्लाहरुमा पनि क्रिकेटप्रति स्थानीय बालबालिकादेखि युवा–युवतीसम्मको लोभलाग्दो मोह देखिएको छ । उनीहरुका अभिभावक पनि आफ्ना सन्तानलाई क्रिकेटमा प्रेरित गरिरहेका छन् । शुक्रबार मात्र राष्ट्रिय टोलीमा परेर सिंगापुर उडेका रोशनका बुवा खड्कबहादुर शाहीले वीरेन्द्रनगरमा खुसियालीस्वरुप मिठाइ बाँडेका थिए । यस दृश्यले कर्णालीका अभिभावकहरु आफ्ना सन्तानको भविष्य क्रिकेटमा देख्न थालेका स्पष्ट हुन्छ ।

शर्माको कप्तानीमा सिंगापुर उडेको नेपाली टोलीले प्रतियोगिता जित्ने लक्ष्य लिएको छ । नेपाली टोलीको उपकप्तानमा सुर्यान्शु कोइराला छन् । त्यस्तै टोलीमा शिवांश बजगाई (विकेटकिपर), परिमर्जन यादव (विकेटकिपर), रौनक श्रीवास्तव, अभय यादव, सचिन भट्ट, सुगम बुढाथोकी, सुयोग भट्टराई, सुशील बहादुर रावल, सुभम खनाल, प्रसिद्ध जैसी, जोय थापा र रोशन शाही छन् ।

प्रतियोगिताामा नेपाल समूह ’ए’ मा रहेको छ । समूहमा नेपाल, सिंगापुर, इन्डोनेसिया, भुटान र जापान छन् । प्रतियोगितामा नेपालले सिंगापुरसँग आइतबार खेल्नेछ । त्यसपछि जापानसँग असार १० गते, इन्डोनेसियासँग असार १५ गते र भुटानसँग असार १७ गते खेल्नेछ । प्रतियोगिताको सेमिफाइनल असार १९ र फाइनल असार २१ मा हुनेछ ।

शुक्रबार खेलाडीको विदाइ समारोहमा क्यानका कोषाध्यक्ष खड्काका साथै प्रशिक्षक दीपेन्द्र चन्द पनि उपस्थित रहेका थिए ।